Ar gyfer Pythefnos Gofal Maeth, rydym yn rhannu sut olwg sydd ar faethu mewn gwirionedd, y drefn reolaidd, yr apwyntiadau, y gwaith tîm a’r eiliadau bob dydd sy’n helpu plant i deimlo’n ddiogel ac wedi’u cefnogi.
Mae Katie a Paul yn ofalwyr maeth tymor byr, tymor hir, seibiant ac argyfwng ar gyfer Blaenau Gwent. Iddyn nhw, nid yw maethu’n digwydd o amgylch bywyd teuluol, mae’n dod yn rhan ohono.
Dyma yw Maethu.
Dod o Hyd i Drefn Reolaidd Sy’n Gweithio
Ar hyn o bryd mae Katie a Paul yn gofalu am blentyn ag anableddau ac anghenion cymhleth. Mae eu dyddiau’n cael eu llunio gan ffisiotherapi, apwyntiadau Meddyg Teulu ac ysbyty, yn ogystal â grwpiau Anghenion Dysgu Ychwanegol (ADY) wythnosol. Ochr yn ochr â hyn, maen nhw hefyd yn gofalu am fabi, sy’n golygu apwyntiadau ymwelydd iechyd, archwiliadau meddygol a sesiynau cyswllt sawl gwaith yr wythnos.
Gyda chymaint yn digwydd, mae trefn reolaidd yn hanfodol.
“Mae trefn arferol yn allweddol,” meddai Katie. “Hebddo, byddai pethau’n teimlo’n wallgof.”
Mae meddyginiaeth, apwyntiadau a sesiynau cyswllt yn aros yn gyson, tra bod popeth arall yn ffitio o’u cwmpas. Mae cael y strwythur hwnnw’n helpu plant i deimlo’n gartrefol ac yn ddiogel ac yn ei gwneud hi’n haws i unrhyw blentyn newydd sy’n dod i’r cartref addasu i fywyd teuluol.
Dyma yw Maethu — creu sefydlogrwydd o fewn diwrnodau prysur.
Y Pethau Nad Yw Pobl Bob Amser yn eu Gweld
Mae llawer sy’n ymwneud â maethu yn digwydd y tu ôl i’r llenni. Ochr yn ochr â gofalu am blant o ddydd i ddydd, mae cyfarfodydd, adolygiadau, logiau dyddiol, cynllunio dyddiaduron a gwaith papur i’w wneud.
Ar adegau gall deimlo’n reit ddwys, ond mae Katie a Paul yn ei weld fel rhan o sicrhau bod plant yn derbyn y gefnogaeth gywir, gyda phawb yn gweithio gyda’i gilydd o’u cwmpas.
Dyma yw Maethu – y gofal sy’n parhau ymhell ar ôl i’r apwyntiadau ddod i ben a’r tŷ yn tawelu.
Gweithio Gyda’n Gilydd dros Blant
I Katie, mae meithrin perthnasoedd cadarnhaol â theuluoedd geni yn rhan bwysig o helpu plant i deimlo’n ddiogel a’u bod yn cael eu cefnogi.
“Mae’n mynd yn haws ac yn llyfnach i’r plant os yw pawb yn cyfathrebu ac yn cyd-dynnu.”
Yn y gorffennol, mae Katie wedi sefydlu grwpiau WhatsApp ac wedi rhannu llyfrau cyfathrebu i helpu pawb i aros mewn cysylltiad ac yn wybodus. Mae’n ffordd syml ond ystyrlon o helpu plant i deimlo eu bod yn cael eu cefnogi gan yr oedolion o’u cwmpas.
Un foment a arhosodd gyda hi oedd derbyn cerdyn Sul y Mamau gan riant geni, rhywbeth bach a olygodd cryn gymaint.
Dyma yw Maethu — cefnogi plant trwy gysylltiad, cyfathrebu a gofal.
Gwaith Tîm Gartref
Mae Katie a Paul yn cydweithio’n agos, yn enwedig yn ystod cyfnodau mwy heriol. Os bydd yn rhaid i’r plentyn fynd i’r ysbyty, maen nhw eisoes yn ymwybodol o’r cynllun, mae un yn aros gyda’r plentyn tra bod y llall yn pacio bagiau ac yn dod â’r hyn sydd ei angen. Mae cael rolau clir yn helpu i leihau straen ac yn cadw pethau’n rhedeg yn esmwyth.
Mae eu plant eu hunain yn rhan o’r daith hefyd. Maen nhw’n deall beth mae maethu yn ei olygu ac maen nhw bob amser yn cael eu cynnwys mewn sgyrsiau am yr hyn sy’n digwydd gartref.
Mae rhai pobl yn dweud y byddent yn aros nes bod eu plant yn hŷn cyn maethu, ond mae Katie a Paul yn teimlo bod maethu wedi helpu eu plant eu hunain i dyfu i fod yn bobl fwy caredig a gofalgar. Maent yn mwynhau helpu ac yn teimlo’n falch o fod yn rhan o deulu sy’n cefnogi eraill.
Dyma yw Maethu — dangos i blant, mewn ffyrdd bob dydd, sut olwg sydd ar garedigrwydd a gofal.
Y Pethau Bach Sy’n Golygu Cymaint
Mae pobl yn aml yn gofyn i Katie a Paul sut maen nhw’n rheoli’r cyfan. Iddyn nhw, mae maethu, yn syml, yn dod yn rhan o fywyd teuluol, mae’n brysur ar adegau, ond yn hynod werth chweil.
Weithiau mae Katie yn dweud ei bod hi’n teimlo fel nad ydyn nhw’n “gwneud unrhyw beth anghyffredin” oherwydd bod pob plentyn yn cael ei drin fel un o’u rhai eu hunain. Ond mae maethu wedi dangos iddyn nhw y gall y pethau bach bob dydd, sefydlogrwydd, amynedd, trefn a bod yno’n gyson, adael effaith barhaol ar fywyd plentyn.
Dyma yw Maethu – gofal cyffredin a all olygu rhywbeth anghyffredin i blentyn.
Dyma yw Maethu
Nid yw wythnos ym mywyd gofalwr maeth bob amser yn rhagweladwy. Mae’n cymryd hyblygrwydd, trefniadaeth, amynedd a gwaith tîm. Ond mae stori Katie a Paul yn dangos nad yw maethu yn ymwneud â bod yn berffaith na chael yr holl atebion, mae’n ymwneud â bod yn bresennol, creu cartref diogel a helpu plant i deimlo eu bod yn cael gofal.
Yn ystod Pythefnos Gofal Maeth y flwyddyn hon, rydym yn rhannu straeon fel eu rhai hwy i helpu pobl i ddeall beth yw maethu mewn gwirionedd.
Dyma yw Maethu – a gallai fod yn rhan o’ch bywyd chi hefyd.
 diddordeb mewn dod yn ofalwr maeth Maethu Cymru Blaenau Gwent?
Cysylltwch â ni –
01495 369620
[email protected]
https://blaenau-gwent.fosterwales.gov.wales/
